ابوذیّات ملتهبات
من هو انت او علی نیران شعلیت
ابّناک اتضرنی بین النّاس شعلیت
لون حبنه ابسمانه گمر شعلیت
او یدگ اصورنه بنجوم الثریّه
...
دگ اصوّر الی بالسدر شامات
او شوف الیفرح ایحب کره شامات
اچّم عاشگ خسر بالعشگ شامات
اشو گلبک رفض ما ضحّی الیّه
...
الاودّه مو بشر لا مَلَک یربای
امن اذکره ابللیل گلبی یفز یربای
علیک اتعوّدت طوّلّت یربای
انتظر دربک ترد صبح و مسیّه
...
ابشبابی او جرنی طور العشگ موشاب
و اطفّی ابناره بالدلال موشاب
یگولولی حبیبک عود مو شاب
و اگول الهم گمر ساهرنی ضیّه
...
تغث و اتمرمر ابحالی بیاحال
او ما تدرکنی ناسینی بیا حال
ترید المستحیل اعمل بیاحال
الجسم ذبلان بس النفّس بیّه
...
حبیبی ابروحی ضمّدتک مشفتک
و اجیتک معرس ابشوگی مشفتک
اذا متقدّر اظروفی مشفتک
البگه ابعمرک غیابک نار الیّه
...
رساله او بالهوی ارسلّک ستوصل
ابعذابک گلبی جسمیته ستوصل
عرفتک ناکر اوعودک ستوصل
متی ما شئت تگرصنی ابخفیّه
...
گمر وسط السماء اتداوم ولک ناب
النجم ما یعلم افعالک ولک ناب
افاعی التفّن ابحقدک ولک ناب
مشعل نار من یگرب علیّه
...
الیرید ایمسنی احس بالگلب موحای
ابعین الترف نایم شفت مو حای
التفل بیده او ضربنی شلف موحای
اذا حی ینتظر موته ابردیّه
...
فتحت ابوابی للکل والبی شاره
تضوگ اشبیه تناول والبشاره
یحن للبیه نداره و البشاره
او یضر الیحقد ابعار او اذیّه
...
دوت نار ابدلیلی من شفتها
تدر و العسل ینزل من شفتها
اشوفن یمی طلعت منشفتها
او تحس وجناتهه او تغمز علیّه
...
خسر کلمن ترک اهله و داره
او یفوز البیه وفه العرضه و داره
ابحیاتی او ریت اشوف الخل و داره
و اعرف الشهم من البیه اذیّه
...
الیعادی اهله او عمامه من فشلته
او لزمتّه المشاکل من فشلته
لعین الباع بخته من فشلته
امثله ابعرس چن راکب مطیّه
...
انتهه عمری او غرگ بلمی بلامای
ابحنان الاب غصت و انبگ بلامای
شلی ابدنیای اضل عایش بلامای
افراگ الاب و الام یصعب علیّه
...
ضجیج اسمع بچی بالعرب وصّیت
او علی البیهم رحم بالهدو وصّیت
الهویّه امن الابو تنتسب وصّیت
الابن لو سبع چن ما مات ابیّه
...
سلام اللّه علی الغسلت و شالت
انگطع بیهه الامل ضاعت و شالت
یحن گلبی علی الربّت و شالت
صحت یا یمه بس مترد علیّه
...
من هو الحارگ اگلیبک وذابک
وحید او ما الک والی وذابک
علیه اللّه الگطف ضیمه و ذابک
او مثل طیر الّی ذبحوه تنعه الیّه
...
غزال او شات من اهله وشم بیه
غصن ریحان و ایعطّر وشم بیه
علی اعناد الخصم ردته و شم بیه
واحس ویّاه فرح مجبل علیّه
...
جاسم ثعلبی (الحسّانی) 07/03/1400
.jpg)
:: برچسب‌ها:
ابوذیّات ملتهبات ,
:: بازدید از این مطلب : 1725
|
امتیاز مطلب : 0
|
تعداد امتیازدهندگان : 0
|
مجموع امتیاز : 0
عضو شوید
عضویت سریع
آمار مطالب
آمار بازدید
